YMA, MHIP LEH MUP TEL VE DAWN LO

Vanneihthanga Vanchhong

Aizawl, July 02, 2014: Central YMA CEC chuan Mizoram Synod in MLTP Act tihdanglam duhloh nana poster tar leh kawngzawh chungchanga thurualpuia a sawmna chu pawl anga tel remchang lo angah a ngai.

Tarlan tawh angin nimin khan Mizoram synod hotute chuan NGO pathum YMA, MHIP leh MUP te kokhawmin Mizoram sorkarin Zu khap burna dan tidanglam a tum mek chu tha an tih lo thu an sawi a, sorkar hmalak tum mek an duh lohna lantirna atana kawngzawh leh poster tar thlengin SEC thutkhawm hmanhmawh chuan ruahmanna a siam thu te an sawi bawk. He dan tihdanglam tur dodalnaah hian NGO te nen an inthurual thei dawn em tih an zawt a, heng pawl pathumte hian an pawlah an ngaihtuah ve leh tur thuin an thlah hlawm a ni.

Central YMA chuan vawiin chhun dar 2 khan CEC meeting neiin he thil hi an ngaihtuah nghal a, Mizorama zu khap burna dan MLTP Act hi hlawhtling taka kenkawh a nih theih nan Mizoram sorkar hian chak zawkin hma la se, kan ram tibuaitu nunna tam tak latu zu leh ruihhlo hi do zel ni rawh se tiin thutlukna an siam a. Chutih rual erawh chuan kawngzawh leh Poster tar chungchangah YMA chu kohhran hrang hrang awm khawmna a nih avangin tel ve remchang lovah an ngai a ni. CEC meeting hi dar2 atanga tanin tlai lam dar 4 thleng an thukhawm a ni. Meeting zawhah an thutlukna hi Synod hruaitute hnenah an thlen leh nghal a, Synod hotute pawhin vawiin tlai khan hemi chungchangah hian meeting an nei leh a ni.

MLPT act thlahdul tum mek dodalna chungchanga synod in phungbawma a sawm pawl dang pahnih MUP leh MHIP te pawhin kawngzawh leh poster tarnaa pawl anga tel chu an rem ti lo nia thu dawn a ni a, vawiin tlaia Synod hotute thukhawm chuan an thu dah tawh angin Poster tar chu an kaltlangpui anga, kawngzawh erawhchu NGO ten an remtih loh chuan kaltlangpui loh nise an ti niin thudawnna pakhat chuan a sawi bawk.

Source: Mizo Special Report